2013年3月22日 星期五

凌天羽:我反對佔領中環行動



文 / 凌天羽

我反對佔領中環行動.
佔領中環, 完全係銀英傳, "亞姆立札星域會戰" 既現實版,
無論係由一個根本未圍過政總既學者去透過特別渠道提出方案的方法;
又或者係"理念之先, 戰事為次" 的大規模攻擊;
仲有唔准之前國教一役"勝利了" 的學民思潮參與;
再甚至乎係想成班中產上前, 直接放棄一切補給(法律上)
都跟銀英黎明篇裏面所寫既, 一模一樣.

事實上, 銀英既故仔係, 響初期同盟軍係完全見唔到敵人的, 人地帝國玩焦土政策沒收所有糧食去拖死補給. 同樣, 佔領中環, 大家可能而家會見唔到政府甚至中共既手影, 但係, 為乜野唔佔政總, 而要佔一個商業區? 今時今日港交所有大半股票都係中資, 若果中共真係玩"經濟焦土", 班泛民佢地既民望會點?

五區公投, 就係咁玩完, 響公投之前所有民意調查都係比實際投票高出20% 的, 你可以查查..... 當時大家都好有信心, 但結果?

至於補給, 在一場戰爭裏面, 戰爭永遠要殺的首要目標必然是醫護兵/無線電兵/爆破兵/機械維修兵, 同樣, 自軍這類特種兵種永遠是首要保護的. 原因是死一個醫護兵, 可能會令數百個步兵失救而死, 死一個無線電兵, 會令一個團失去聯絡....

但你要知道, 訓練一個步兵, 只需要18 星期, 但訓練一個特種兵, 所需要的時間和金錢是一個一個步兵的數十倍.

中產多有專業資格, 而呢堆專業資格係唔容許佢地有刑事案底, 呢一類人若果做支援/補給的話, 對香港的民主運動來講, 係可以keep 住最強既支持, 但若果呢一班人走上前, 就絕對會成為打擊目標. 當一大班有專業資格的中產被起訴, 日後如何在各方面去支持泛民?

再唔講戰略上, 單講戰術運作層面, 好嗎?

若果將佔領行動視為打仗的話, 那最嚴重錯誤就係武將撤走, 而將文官放前, 呢個係痴線的行為.

若果係長毛/阿牛/甚至係毓民大舊圍政總, 操作上面我都仲可以接受, 呢一類人衝慣, 亦圍慣, 佢地有實戰經驗, 知道包圍的運作, 補給同過程, 而唔係由一個學者學趙括咁紙上談兵.

最簡單講, 學民思潮響去年8/9 退果時, 其實都係遇到呢個問題, 明明隔離有個廁所可以駁淨水機, 但竟然因為食水不足而要十幾萬人帶水, 去到最後甚至係"又累又餓" ....

早幾年響舊政總好常會圍到一兩點, 原因係阿牛長毛班人會響包圍政總果時, 買埋飯班埋水然後好搵方法送入政總(係要突破封鎖才可以送入的). 仲要搭埋廁所響政總. 以上種種, 你認為, 其餘的泛民有無呢一種經驗, 或者想法?

呢個就係操作既經驗, 若果比人圍, 又渴又餓, 圍你十二小時好嗎? 結果如何? 大家心中有數.

輸唔緊要, 但要輸得甘心, 一場必敗的仗, 打完分分鐘還會受到千夫所指時, 就要小心.

就算戰術做得幾咁好, 有幾好既將領, 都填補唔到戰略上既失誤
佔領中環既戰略失誤, 就係響一個經濟區度打政治戰, 響外媒上面, 己經有外國關注佔領中環會否影響商業運作了, 我開宗明義就係怕中共會以經濟換政權, 對中共來講, 政權重要性 >>>>>> 經濟

即係會搞經濟焦土戰, 雷曼兄弟就係其中一樣. 自己國家執一家公司, 十幾個亞洲國家無左幾千億.... 只既然己經得到外國關注, 即係今次不單比左機會中國, 香港大部份HSI 股票都係中資, 若果人地藉呢一單野搞一搞個市, 不單可以靠香港打擊家陣正在復甦既美國經濟, 仲可以將擾亂金融呢個罪名送比泛民. 同樣, 外資一樣可以用同樣情況搞大陸...

要知道, 香港股市一向係中資與外資既賭場來的, 無論係點, 幾有感召力都好, 如果因為佔領中環比中資做手腳插三四千點, 咁班人士氣會點? 響香港, 阻人發達猶如殺人父母, 香港大部份人會點看?

我仲記得97 股災之後, 我番大學, 全校既lecturer 都黑晒口面..... 教師, 律稍係咪唔會炒股票的?

而家泛民係響度下一局好大既棋, 而呢一局棋, 在我地留守慣既人眼中, 係處處破綻, 可以想像中共除左用經濟焦土對付泛, 仲有乜方法對付泛民, 而呢一大堆失敗既可能, 泛民有無想過, 去預防失敗? 例如:
1. 癱瘓經濟令中環返工的人離棄泛民;
2. 間諜滲入並引發暴力, 讓警方合理清場
3. 若果打持久戰的話, 支援被切斷
4. 傳媒完全不發聲, 不宣傳, 就好似上一次佔領匯豐一樣, 最後被被人遺忘.
5. 好似學民思潮, 教國, 政改一樣, 政府拋出一改良方案, 但原來魔鬼在細節中.
6. 響企業裏面清算有參與佔領中環的員工.

若果要改變戰略失敗, 我只能夠提幾點:

1. target 政總, 唔係中環, 若果以軍事, 中環係"中立區" 唔可以進行政治抗爭的.
2. 補給充足, 淨水機 (政總有廁所可以取水) / 食物/營幕/醫療/衛生/通信
3. 有衝擊經驗, 更應該組成不同隊伍去負責不同的崗位
4. 支援上面, 前線要預左衝, 但留守果一大班人, 有心的可以做補給等工作, 有專業能力的組織支援隊伍. 佢地唔應該衝.
5. 自古打仗徵丁, 只會係三丁取一, 五丁取二, 獨子不取. 因為呢個係士氣理由(可看看信陵君救趙), 同樣, 無論係乜階層, 若果佢係家庭經濟支柱, 唔可以無左份工/手停口停的話, 就勸佢地站後, 並鼓勵非經濟支柱的話出來.
6. 一係贏, 一係輸, 只可以佢地接受 無條件投降, 而唔係人地拋一個改良方案就好似餓狗咁走埋去搶. 無什麼"我們勝利了" 但其實之後先至比政府慢慢拖住來玩(eg: 菜園村重建/國教/還有政改)

孫子兵法第一章:
兵者,國之大事也;死生之地,存亡之道,不可不察也。故經之以五,校之以計,以索其情。一曰道,二曰天,三曰地,四曰將,五曰法。