2013年3月25日 星期一

港蛙民憤的最大公約數




再講一D大家可能唔o岩聽的話吧!

喬曉陽講到明2017將會係假普選……啊!呢一刻你話好憤怒。但請問,真正感到憤怒的人有幾多?你身邊的人有無表達憤怒?再簡單一D,問下你老豆老母會唔會因假普選而「好憤怒」?——答案應該好明顯吧?

但如果明日高永文行出來講,下星期就取消限奶令,將會有幾多人「好憤怒」?我想,大概只有走私賊同藥房老闆「唔憤怒」吧?

講到明係「港蛙」,就請唔好當普羅香港人真係好有政治智慧 (如果有,TVB就唔會有幾百萬觀眾),蛙類係唔會因為無得揀浸滾水定浸凍水而憤怒,只要有水(錢)就得。之但係,如果你話要斷蛙的糧水,連食都無得食,呢班蛙類就一定會識驚。

糧水奶粉、生活物質,就係港人憤怒、恐慌的「最大公約數」。

港共同舔共陣營最鍾意講乜來"凶"港人?——「反中亂港?信唔信斷水斷糧?」,然後呢,那班蛙類就會好驚,自願做埋維穩部隊去叫你收聲。我地再多努力解釋畀佢地聽香港唔駛靠中國乜乜物物,都係冇用。蛙類之所以係蛙,係因為佢地就冇你咁有智慧。

其實,港共都認清這個事實了,知道糧水最work。只係我地仲呃緊自己,認為普選先最work!

要醒了!要反抗中國殖民、要護港,就要動用港人憤怒的「最大公約數」,即物質生活受威脅——糧水奶粉、醫院床位(雙非)、福利資源(大陸殖民)、生活習慣(殘體字)、港粵邊界(新界東北)、學位(小學大學研究院)、職位(北方優才/低技術單程證移民)、活動空間(自由行) 等等。就係現今港中矛盾最尖銳的地方。

之但係,仲會有好多所謂政客所謂知識份子,會話咁唔夠「和理非非」,係激起民憤,係搞「民粹」。

我會說:如果激起民憤真係可以帶香港逃出生天,我認為,多多民憤都唔夠!更重要係,一些人冇普選可以「好憤怒」,點解港人因為冇奶粉「好憤怒」而要反抗,就係搞「民粹」?你憤怒得?難道我就唔憤怒得?

你會質問:假如中共解決晒以上物質問題,係咪冇普選都得?

我會回答:如果物質問題解決唔到,再講普選又有乜意義?

冇讀歷史可能唔知,點解當年納粹屠殺猶太人,猶太人冇大規模反抗,而係乖乖排隊行入集中營,原因唔完全係蓋世太保用槍指嚇,更多係因為好多人未受死前都覺得自己唔駛死,甚至行入毒氣室前的一刻都係咁諗。結果呢?

一個沒有道德底線的暴力機器,可以不擇手段去做任何事。而心存僥悻的群眾,就永遠覺得自己有一線生機。雙方就此一拍即合,造就史上無數人道災難。納粹屠猶、南京屠殺、大躍進大饑荒、西藏……

事實已經擺在眼前:中共係納粹,德國人係大陸人,猶太人就係香港人。只講普選或繼續奢談什麼「和理非非」,再唔用盡一切方法去反抗,集中營之門已為你打開。